martes, 29 de abril de 2008

Nunca llovió que nun abocanara

Que cosa curiosa esta de la meteoroloxía, sobre too si quies salir al monte. ¿lloverá, nun lloverá, llevo ropa bastante?, ¿meto'l paragues o el pantalón d'agua?
Que cosa curiosa esta de decidise a salir al monte cuando'l día anterior tá lloviendo. ¿y si lo dexamos pa otru día?
Que cosa curiosa esta de quedar en casa, cuando a les siete la mañana sientes el agua golpear nos cristales y suena'l teléfonu y sabes que ye otru día mas ensin monte; mas, sabiendo que cuando te levantes a les diez, nun va caer gota y el día va tar radiante.
Que cosa curiosa, esta d'esperar que amanezca lloviendo, pa ser tu el que llames a los colegas y suspendas la xornada montañera. Ayeri acostástete a les mil y güei ties una resaca de: queda quietu ehí y nun te muevas.
Que cosa curiosa esta de pensar: igual esti agua que cae, mañana ye nieve.
Que cosa curiosa, que ya nun llueva tanto como antes.
Que cosa curiosa, que quieran facer un pantano en Caliao cola escusa de dai de beber a la xente, cuando toles nueches despilfarren el agua pa regar les cais.
Que cosa curiosa, que se peguen polos trasvases p'asegurar el riegu nes güertes, cuando'l Polaris world tien campos de golf, estanques y fontes per toles esquines.
Que cosa curiosa que-y tegamos perceguera a la lluvia, cuando toes sabemos que'l agua nun ye como lo feo, el agua polo menos seca y desaparez.
Que cosa curiosa, que llueva que llueva, la virxen ta na cueva, los paxarinos que canten, que les nubes se levanten y al final aparez un chaparrón.
Que cosa curiosa, que tengan que romper los tus cristales y los mios non.
Que cosa curiosa que nunca lloviere que nun abocanare.

NON AL PANTANU DE CALIAO






No hay comentarios:

Publicar un comentario