sábado, 31 de mayo de 2008

Fosa común nel rio Casaño

Ya tábemos de vuelta. El camín parecía desconfiar de nosotres y por momentos, perdiese ente felechos y herba alta. Taba bien, habíemos comentao de dir a xintar a un chigre; pero ya sabéis como son estes coses, cuando menos lo esperes, perdiste la noción del tiempu y lleves caminando cerca de tres hores. ¡Y entobía queda la vuelta! Menos mal que somos xente precavio, al menos algunes, y aunque seyan rutes cortes, meten dalgo de zampar na mochila, de lo cual aprovechámonos el restu.
El sitiu que escoyimos pa parar y comer un pinchín, yera per afayaizu. Tábemos n’una revuelta’l riu, n’un situ con una riestra llavanes perfectes pa comer y dormir la siesta. Y rodeaes por unos cuantos charcucos que formava’l propiu rio cuando-y crecia el cauce.
- ¡Sapristi! ¿Visteis qué cantidá de ranes muertes?
-¡Flipa! Debe de haber polo menos veinti.
-¡Ala, esaxerau!
-¿Esaxerau? ¡Pero mira pa ehi, si ye que les hai en tolos charcos!
-¿qué mal royu non?
-Si, y mas, viendo que tan rodeaes pelos güevos.
-¿Qué pasara, que vienen, ponen los güevos y muerren?
-Sedrán como los elefantes, que dicen que cuando se faen vieyos, separtense de la manada y va morrer tos al mesmu sitiu.
-¡Fatu!
-¡¡¡Mirai, mirai, esta tien un sapu enriba d’ella!!!
-¿Tara vivu?
-¡Ana Moro! ¿Quies dexar de tocai les ñarres al pobre bicho? ¿nun ves que la ta velando?
-Que royu yes tio.
-Que movida mas rara, nun se si vos fixasteis, pero nel restu de pozes y nos otros sitios tranquilos del riu, nun se veia nenguna.
-¡Que cosa! Estes ranes tan lloques, como los romanos.
-¿Igual quereis comer equi, mirai que igual tamos profanando un cementerio batraciu?
-Vosotres si que sois batracies. ¿Nun deciais que traiais comida?
-¡Cacho cabrón!
-Amen.




martes, 27 de mayo de 2008

A traves de...


Ye curiosa la expresión: "pasar al traviés del güeyu d'una cerradura". ¿Y la que diz nun se que d'una aguya de coser y un elefante? ¿cómo yera? Dalgo asina como por exemplu, si tas faciendo algo y yo digo: "eso que tas faciendo ye tan imposible de facer como que un elefante pase pol güeyu d'una aguya de coser" (¿existirá esto que toi diciendo o directamente tare inventandomelo?).
Vuayere. Dícese d'aquel que se dedica a espiar les acciones de les demás, dando-y lo mesmo escondese que non. El vuayere dedicose tola tarde, a observar como diva cambiando la obra. ¿Tare falando d'un xubilau? El vuayere nun escatimo esfuerzos pa poder espiar a aqueya pareya qu'empañaba los cristales del coche.
Oquedá. O queda, o se va. Oquedá: furacu, fendidura, pozu, (¡madre de dios!, ¿nun se me ocurre mas?) Oquedá. ¿cómo suena la pallabra esta non?. Oquedá.
Que estupidez........




martes, 20 de mayo de 2008

Un día de playa

De sobra conocio ye, que a les sacaberes yos presta lo nidio, la solombra. Pero nun quita, y eso ye una realidá qu’entobía nun ta contrastada, que también yos preste dir a la playa. Non, nadar nun saben, pero floten y dan a les patuques. ¡Son tan perstoses…!
Lo que de verdá nun saben, por muncho que digan, ye surfear. ¡Y mira que son modernikis! Pero non, lo de cabalgar les foles nun ta fecho pa elles. Una vez intentáronlo, unos socorristes prestaron-y una tabla d’eses a una que conozo y fue incapaz de ponese enriba d’ella. Toi viendolu: llega la fola, el espatuxa, pega un blincu y… a tragar agua,. Mecagüen los socorristes de los… La realidá, ye que mas que socorristes yeren unos capullos, porque aunque nun había grandes foles, menos mal, la mar nun taba pa aquellos menesteres; los menesterosos, yeren aqueyos chulitos de playa que tuvieron un buen cachu riéndose de la probabilidá d’afogase d’aquella sacaberina guapa. ¡Madre de Dios que manera de tragar agua, que poco sentiu del equilibrio pue llegar a tener alguien y que incapacidá manifiesta de nun poder ser nunca como’l Body aquel de la película! ¡Cachis!


Lo que si-y presta a les sacaberes son esos neoprenos tos ceñidos. ¡Mmmmmm, que cuerpos! ¿sedrá verdá eso que dicen, que na mas ponelos méxense dientro pa mantener el calorín? Yo nun lo creo, pa eso te venden traxes de diferentes grosores. Aunque si lo que faes ye surf n’inviernu… ¡colo frio que ta’l agua! Si, de toes maneres ye un poco gocho.
Ya tamos en Mayu, mes de les flores. En breve podremos dir a la playa y pensar en bañanos y en ponenos morenes y en comer tortilla con arena y descubrir, que tiempos pasaos, siempre fueron meyores, que lo que nun pesen son los años, son los kilos. ¡Valla!
El surf, que gran inventu, aunque ya quisiera yo ver a dalgunes d’eses que vacilen, cabalgando una fola de tres metros o mas. ¡Je!. Velo pa creelo. Body solo había unu, y yera un personaxe de película.
P.D.
Por supuestu, la banda sonora d’esti post, ye cualquier canción de los neños de la playa o Beach Boys.

viernes, 16 de mayo de 2008

La fiera de mi niña

Cuando la fame aprieta y crees que nadie te ve...







jueves, 15 de mayo de 2008

Buscando casa



Pa una meyor comprensión d’esti post, use la llingua de los caracoles, na so variedá de: “¡¡Si, soy un caracol, ¿qué pasa?!!!”

Tralaralarita, busco una casita, que tenga de todo y sea bonita.
¡Hola!, soy Benito el caracol. Si, ya se que me parezco a un limiagu. ¡¡Eh, eh, cuidadín, lo de babosa ya me parez un insultu.
Si. Soy Benito el caracol, lo que pasa ye que dende que lo de la capa d’ozono ta tan fastidiada, a la mínima que te de un puquiñín el sol, póneste como un zapatu.
Toi buscando casa, ¿sabéis de dalguna que seya afayaiza? Lo que mas me preocupa ye’l preciu, el restu, con que tenga cocina, bañu y una habitación voi de sobra. Na última que tuve, echome’l dueñu, decia que la queria pa una fia, y ja… El mui cabrón lo único que quería facer yera especular. Sabe que si la mantién cerrada una temporada, el preciu duplicase, al nun haber oferta, los precios ponense poles nubes, colo que los que tenemos un sueldu de mierda, n’un trabayu de mierda, nun podemos acceder a ningún pisu. Dempues, échennos en cara que nun queremos marchar del senu familiar, que vivimos como reis,.
Y el casu ye que nun dexen de construir cases. ¿Quién les compra? Toa esa xente, ¿de onde saca les perres? Menuda inversión que ye tener agora un pisu en propiedá, nin el arte da tanto. Lo malo son les hipoteques. ¿Realmente pensáis tar pagando fasta los setenta años? ensín contar que ties que seguir viviendo. Nun-y lo digáis a nadie, pero personalmente, prefiero disfrutar eses perres. Si, ya se que mientres alquiles nun ye pa ti y too eso, pero entós faigo la pregunta d’otra manera ¿realmente queréis tar tola vida nel mesmu sitiu? Claro, va ser que nun entendéis la mentalidá d’un caracol.
Que jodiu’l tema de los alquileres, los pisos, les families y los hogares. ¿Sabéis qué? ¡Que la solución ye la okupación!, y como decía Felisín; por ciertu, tengo que preguntai si sigue pensando lo mesmo; que lo único que merez la pena tener, ye lo que t'entre n’una mochila. Asina, si ties que escapar, ye mas rápido y menos pesao.
Mirai pa ehí. ¿Gustavos esta? Uf, a mi mólame. Igual d’entrada un pelín xustu, por tamañu, digo. Pero perfecta. Voi ver que ye lo que hai dientro y ya vos cuento Si non, pa la inauguración tais todes convidaes.
Quien okupa preokupa, pero una casa okupada, felicidá asegurada.







martes, 13 de mayo de 2008

V Xornaes de monte Ibice-Cuadonga

¡Ya ta! El trabayu d’un añu ventilao en cuatro días.
Je, je. Non, ye mentira, que trabayu nun nos llevo na.
Pasaron ya les V Xornaes de monte Ibice-Cuadonga. Y la verdá, ye que fueron un éxitu. Siempre claro, que consideremos éxitu una media de 30 persones cada día. Polo tanto un éxitu. Comprendei que son unes xornaes de les de andar en zapatilles por casa, muy austeres, ensín grandes derroches de capital, pero con una gran imaxinación.
Fixaivos: Jorge Coto faciendo disfrutar al respetable col viaxe que fixo a Ecuador (selva tropical, altiplano y Galápagos). El, “ye biólogu”, al menos quedai muy poco pa terminar la carrera, y notase que-y apasionen los bichos. Aparte de ser un auténticu profesional de la oratoria. Sabiemos que diba ser un éxitu asegurau. Mas, cuando nun yera la primer vez que lu teniemos n’unes xornaes.
El martes, el turnu era pa Fernando Collía. Montañeru de pro y aficionau a la fotografía.
Fernando tenía’l encargu de facer una charra con proyección sobre la montaña asturiana, cosa que cumplió a rajatabla. ¿Cuántos nomes de picos, collades, mayades, cordales y demás ades que se vos ocurra puede saber una persona? Fernando Collía sabialo todo. Y cuando digo todo, nun quiero decir casi todo, si non todo. Tolos nomes de valles, vallines y vallaos, collades, morres y camperes. Yo que se. ¿Sabéis que pasa? Que pa mi, ye dalgo personal, la proyección fizose bastante monótona, un pelín gris y polo tantu, llarga. Sientolo.
El miércoles “actuó” Manuel S. Juan, en realidá, Ahmed. Un rapaz que lleva dende los nueve años n’Asturies y que tamien conoz la montaña asturiana como la palma de la mano, aunque non como Fernando. Esti sabia casi tolos nomes de casi tó. Un crack tamien el bereber, como el mesmu se denominaba.
EL remate tubimoslu el xueves con Xuan, un mozu d’Aviles aficionau a la bicicleta y que como Jorge llera la segunda vez que taba nes xornaes. La vez pasada había tao con unos colegas pola parte del norte de China y el sur de Mongolia. Y agora venia a presentanos el viaxe que había fecho, el solu, al travies de la carretera austral, ente Argentina y Chile. Una proyección guapa. Más que proyección, un alarde tecnolóxicu. Bueno, igual non tantu, lo que pasa ye que’l restu traien diapositives y esti neñu fizo dixital, y traialo ya preparadino con titulos y toes eses cosines que lo faen too más guapo.
¡¡¡REPETIMOS!!!
¡Éxitu de les V Xornaes de monte Ibice-Cuadonga!

Que sepais que’l comandu itinerante del Ibice, ya ta dando-y vueltes a les VI Xornaes, asina que si tenéis dalguna proyección guapa o ganes de preparala, solo tenéis que danos un toque y ya veremos como lo facemos. Eso si, nun esperar que pagamos un euro a naide, como muncho, un detallin y una botellina sidra, o dos, o tres, o …, eso podemos aseguravoslo.

miércoles, 7 de mayo de 2008

Realityshow animal

Flipa. Solo tengo un par de minutinos, pero apeteciame compartir esti tema.
Resulta que na reserva de Cabañeros, en un llugar de cuyu nome nun voi a acordame, inidentificable, ta siguiendose el día a día d'un pollu d'águila imperial, especie en pelligru d'estinción. Bueno, mas bien ta siguiendose a tola familia. Si quereis facer de "vualleres" col pitín, cliqueai en http://www.aguilaimperial.org/ y accedereis a la paxina de SEO (sociedá española ornitoloxica) que vos explicará: "que'l águila imperial ibérica ye una especie única, que ta localizada exclusivamente nel centru, oeste y suroeste de la península Ibérica. El nuesu estau, que acoge el 99% de la población reproductora mundial, ye'l máximu responsable de la so supervivencia y que col obxetivu de contribuir a la conservación d'esta especie tan emblemática, SEO/BirdLife puso en marcha el ambiciosu Programa Alzando el Vuelo. Nél englobense toles actuaciones que SEO/BirdLife desarrolla a favor del águila imperial ibérica".

martes, 6 de mayo de 2008

Albun de fotos de la sacabera


¡¡¡Bien, bien, bien!!!
Pa les que desconozcan la vida cotidiana de les sacaberes, deciyos que ye común la falsa apariencia de dexadez y abandonu que tienen.
Lo que pasa, ye que somos bichinos que faen les coses despacio, sele, con calma. Nun se, si pensando o non lo que faen, pero dende llueu, dandose tiempu.
Ye por esti motivu, que nos alegramos ¡¡¡bien, bien, bien!!! con cada llogru que conseguimos. Que quereis, somos asina de cachondes y animoses.
La última gran victoria ¡¡¡bien, bien, bien!!!, ye l'aparición del "albun de fotos de la sacabera". Si pinchais sobre la dirección que sal ehí, podreis acceder al conxuntu, por bloques, de les semeyes que les sacaberes vallan faciendo.
De momentu solo ta el bloque que corresponde a la salida de monte: Orlé - Los Tornos. Pero si dais un poco de tiempu, aseguramosvos que vamos dir colgando tolo que tenemos... ¡Bueno!, igual nun todo, pero casi ¡¡¡bien, bien, bien!!!
Solo teneis que tener un poco de paciencia.
Les prises son males pa cualquiera, lo único que nos faen, ye dir de culo.