jueves, 26 de diciembre de 2013

Solysombra

Día bien guapu nel entornu la peña'l vientu y la rapaina.



domingo, 22 de diciembre de 2013

Fun Fun Fun

Tan venga pasame imáxenes del gordote Nicolás pela cabeza. Ta sentau nun butacón d'oreyes con tola pachorra de vieyu encaneciu cuntando-yos dalgo a unos neños y a unes neñes; imaxinais? Que si fuisteis buenes, que si obedecisteis a papa y a mama, que si estudiasteis, que si, que si, que si..., que pesau el tío castrón. 
Pues eso, por alguna extraña razón que nun termino d'atalantar, veolu ehí, sentau delantre d'una chimenea metanes fuera ta nevando; bucólico que te cagas; y ta cuntando-yos un cuentu. Non un cuentu cuentu, si non un cuentu del palu "La Cenicienta" "Cuentu de Navidá" "Capiellin Colorau", yo que se. 
¿"Hansel y Gretel"?



jueves, 5 de diciembre de 2013

“Bereitschaftspotential”

Nos años setenta, Benjamín Libet, reconociu neurólogu del departamentu de fisioloxía na Universidá de California, fizo una serie d’experimentos col enfotu de determinar cuáles yeren los estímulos mínimamente necesarios p’algamar una sensación consciente nuna persona. Sicasi, un resultau inesperau d’estos esperimentos, determinaba que yera necesario esperar 500 milisegundos, enantes de que los estímulos aplicaos a les persones de la preba, tuvieren diches sensaciones. 
 Nun entamu, nun parez haber na raro nesti fechu, porque a la mayoría de nós, resúltanos natural pensar qu’hai una rellación causal ente los estímulos que recibimos y les sensaciones qu’esperimentamos. Anque, quienquiera que tenga un puquiñin d’esperiencia nel tenis de mesa, sabe bien qu’una rempuesta fecha medio segundo tarde, bien puede ser la diferencia ente la victoria y la derrota. 
Ya tá ¿Cómo qué ya tá?




martes, 19 de noviembre de 2013

De Boñar, boñaerense ¿non?

¿Por qué non?, vamos intentalo. 
Imaxinar una milonga arrabalera. 
Imaxina-yla xunto al riu Porma, plateau nestes feches polos cielos plomizos y los colores de les fueyes muertes que caen de los árboles anunciando l’iviernu. 
Imaxina-yla tamien, tapecida pola borrina que cuerre pente los pinos d’esta sierra castellana, serondiega y “boñaerense”. 
Nun dexar d’imaxinar. Imaxina-y el baille milongueru. 
Imaxina-y esa danza qu’enxareya les piernes de les pareyes qu’abarroten el teleclub, ente tragos de botellines mahou y güeyades tedioses al fubol, nun ranciu y friu domingu d’ochobre. 
De Boñar, boñaerense ¿non?




viernes, 15 de noviembre de 2013

Ferrates La Hermida

Pa subir al cielu necesítase una escalera llarga. Una escalera llarga y otra cosina, a saber: cascu, arnes y cintes disipadores. Los guantes son opcionales.




lunes, 4 de noviembre de 2013

Jalogüin

¿Habralo más guapo qué tener escuses pa xuntase y pasalo bien?



lunes, 28 de octubre de 2013

In Memoriam

Va tiempu ya, que les sacaberes, como nidies responsables d’ “Ultramarinos Vallina”, colgaben el cartel de “trespásase” na persiana del colmau de Radio Sele; dexando pa la intimidá, una estaya musical que vivien intensamente. 
Poro, güei, día en que s’enteren de la desapaición d’un referente contracultural, nun podien dexar d’asomar la cabeza, p’acordase, qu’esti requexu virtual, foi un día complementu visual y trastienda del so pasu pola radio fecha n’asturianu, motivu de que nesta ocasión, seyan elles les que firmen estes lletres y rindan un sentiu homenaxe que quier ser sonoru y metafóricu. 
La banda sonora, ponla como nun podia ser d’otra forma la Velvet Undergroun, banda na que milito Lou Reed. 
La imaxe, ponla la imaxinación, treslladando a los nuesos dies, a una Nico infantil y despreocupada; ensin saber, que col caleyar de los dies, convertiriase nun …, bueno, eso meyor vamos dexalo pa mas alantre. 
Cuerre’los añu 66. Suena “I’ll be your mirror” y todes somos modernes.




miércoles, 2 de octubre de 2013

Hestories de la puta mili (o como homenaxear al dibuxante Ivá con un enfoque paternu filial)

¡Sorpresa! 
Nun podéis imaxinar la sorpresa cuando m'entero, que Daniela ya yé amenazada con tar castigada ensin recreu (omito que solo lleva dos selmanes de cursu, del só primer cursu). 
¡¿Ensin recreu?! 
Quiciaves pola inminente cumplidera d'años dichosa, quiciaves por…, yo que sé por qué; el casu, ye que entérome y viénseme a la memoria, un asocediu personal d'escapismu infantil que diría un poeta cualisquiera. Cuéntovos. 
Cuerre l'añu..., ¿acordaisvos d'aquello que llamaven párvulos? Pues eso. Ye un día cualquiera de parvulariu na escuela, cuando al llegar la hora’l recreu, ensin acordame del porqué, o ensin querer acordame del porqué, la mayestra decide dexame castigau ensin lo meyor de los años educativos. Nun duldo de les sos razones, ya llovió muncho como pa volver a enfadame. La cosa, ye que mientres les voces gayoleres de les mis compañeres van abriéndose pasu ente los requexos de la mió indignación infantil, decido que hai que poner solución; non ocurriéndoseme meyor idega que saltar pela ventana. 
¡¡Qué gran momentu, qu'escesu de valentía, que subidón!! 
Pero claro, nun ye valiente'l que nun segundu fae alarde de gallardía, si non el que aguanta un minutu faciendose fuerte na so convicción de tener razón. Yo duré valiente como treinta segundos, los que me llevó a pensar no que acababa de facer y desconsoladamente poneme a berrar entrugando pol mi hermanu, que diva unos cursos p'enriba mio. 
¡¿Que van castigar a Daniela ensin recreu?! Esto…¿qué fizo? ¡Pero… ¿Tienen rexes les ventanes?! 
¿Cómo ye la mente non? Tengo qu'entruga-y a mió padre si s'acuerda d'aquello y que-y paso a él pela cabeza cuando-y lo cuntaron, aunque conociéndolu, dexuru que nin s'acuerda, meyor-y lo entrugo a mió madre. ¡Y tengo que cunta-ylo tamien a Ana Moro! aunque me parez que ya sé cuál va ser el comentariu: ya ta'l güelito Cebolleta coles hestories de la puta mili. 
Por ciertu, a Daniela al final nun la castigaron.



P.D. Casualidaes de la vida. L’otru día pasé per delantre’l colexu públicu la Corredoria, llugar del asocediu d’escapismu y nun pude remediar el parame a facer esta semeya. Remarcada ta la ventana protagonista d’esos treinta segundos d’obligada desobediencia infantil.

jueves, 26 de septiembre de 2013

steve jobs vs bill gates

Traxeron-y entós a unes neñes pa que-yos impusiera les manes y rezara so elles. Cuando les discípules lu reprendieron, dixo-yos: "Dexa-y a estes criatures y nun-yos impedir que vengan a mí, porque’l reinu de los bits pertenez-yos".
Asina seya.




lunes, 16 de septiembre de 2013

Rendición

Definitivamente esto de blogger me supera.
A día de güei, soi incapaz d'acceder a mi cuenta dende'l ordenador de sobremesa, esta entrada ta faciendose cola tableta, asina que se me complica y muncho el poder seguir con esto.
¿Rendición? Tal vez. ¿Cascancia? Seguro.


jueves, 22 de agosto de 2013

Nuesa Señora del Remediu



Qu’el 15 d’agostu ye día grande, nun lo vamos negar, pero nel pueblu d’El Remediu, nel conceyu Nava, grandes tamién son el 14 y el 16, feches ente les que se cellebra la festividá de la nuesa señora de los remedios y que saquen a pasear na mañana del día 15 como manden la curia y la comisión de festexos.
Tamos falando d’una folixa de prau pequena, ye esti un pueblu pequenu, pero que queréis…, llegar al prau de la fiesta y la primer sensación que se tenga, seya la del golor de les fabes cociendo pal día siguiente, faenla grande, inmensa.



Les fabes espumándose y tar too preparao pa la primera de les tres nueches que mos esperen per delantre, faen que mos sintamos ansioses y con sede.
Colos primeros culetes filosofamos so lo que tienen camudao les folixes n’asturies; agora too son carpes nos praos y espantu al pensar qu’el día la patrona pueda llover, menos mal, que seguimos manteniendo la tradición del paragües de lluz.



L’actividá pa esta nueche, son les partides: partides de tute y parchís, aunque a lo primero que probaremos fortuna, cosa esta que tendremos, ye al bingu. A la llotería si lo quereis. A una llotería de pipes y familia, onde nun se canten les llinies y los premios van d’ente los venti a los cuarenta eurazos. ¿dixe ya que tuvimos suerte?
Lo que va depués, ya ye pa profesionales, y nun falamos en sentiu figurau; al parecer, nun montón de fiestes cellebren parties y toes con premios “cuantiosos”, por eso, la existencia de pareyes de xugaores, tantu homes como muyeres, que se dediquen a dir polos pueblos intentando facer l’agostu, y d’ehí tamien, les cares de repunancia de ciertes persones cuando ufiertes un culete al so contrincante.



Lo que vamos echar de menos esta nueche, ye la carencia de banda sonora, dalgo que dalgunes nun entendemos por ser víspera de fiesta, que-y vamos facer…



Alborez tarde’l día quince d’agostu, día grande nes fiestes d’El Remediu, asina que lo meyor ye reponer les fuercies gastaes la nueche anterior y dir a enfrentanos con gustu a la sesión vermú, que pasa por momentos lipotímicos debio al escesivu calor que fae debaxo la carpa que tan moderna y previsoramente ta colocada nel “Cantu”, que ye’l prau de la fiesta.
Vermú y procesión de la nuesa señora; la nuesa, la suya, la d’elles, la de todes. Puya’l ramu y fabes. ¿Tamos todes? ¿Tenemos el tique tol mundu? Fabes, ensalada y arroz con llechi, ¿dalguien da más por menos?



De tarde y ente’l sopor y la repunancia d’una bona fartura fabes, les neñes y los neños xueguen al pañuelu y a la silla (ye esti un bon momentu pa reconoce-yos la importancia, de quien ensín remuneración nenguna, vense someties a tan ingrata tarea, polo menos pa esti que suscribe).
Les mas pequenes pásenlo bien y son protagonistes de les fiestes durante un momentu, el xustu pa que baxe un puquiñin la fartura y mos de tiempu a doblar el chupiteo de les que durante otru momentu van sentise pequenes. Llega la hora de los partios: muyeres per un llau y homes per otru, equí nun se xunten, nun conozo sitiu nel que se xunten; y mira que son modernes equí en Remediu…, solteres contra casaes y casaos contra solteros ¿imaxinais lo que podria ser un partiu de casaes contra casaos? ¿Y un conbinau de solter@s contra casa@s? Ehí queda la idega, que nos nun somos del pueblu.



Cuando la tarde languidez, renacen les hores, la orquesta afina los sos instrumentos y todes tamos ya dispuestes a dalo too. Foi un dia llargu y espérase una nueche acordies colo antecedio.



Solo son dos les mañanes que llevamos equí y pa dalgunes pónensenos cuesta p’arriba, que suerte de quimicefa.



Entos que ¿vamos tomar el vermú?
Tamos nel día del bollu, qu’en Remediu significa merendar en prau toles socies de l’asociación de vecines y allegaes, too condimentao con bollu preñau de chorizu y panceta y botella vino o sidra, lo qu’apeteza.
Pero nun mos adelantemos, que nos tamos entá nel vermú ¿o más bien tendríemos que decir vermú/xinta/merienda?
La verdá, ye que tamos un poco soles nesti prau, nun sabemos si pola presencia de les mesmes camisetes qu’el día anteriór o por esos güeyos que a tres díes de fiesta van diciendo ¿bailes?



Como nun podía ser d’otra forma, la nueche gárranos traballando alrodiu de les meses qu’acondicionamos coles viandes más esquisites de tola redolada: tortiella, empanaes, bollos preñaos, pitu empanau, embutiu variao… y claro tá, too regao cola que dicen meyor sidra de la comarca la sidra, ehí somos naide.
Lo que queda de les fastuoses fiestes d’El Remediu, ye imaxinable, a naide voi cuntar nada nuevo: dos orquestes amenizando’l bailongo, exaltación de l’amistá, l’asturies de Victor Manuel y espantada cabera por posibilidá de ser nos pa desmontar el tenderete.
Grandes les fiestes d’El Remediu, qu’esperemos, l’añu qu’entra, vuelvan cellebrase.