domingo, 27 de enero de 2013

La familia bien, gracies

Domingu ente infernal y paradisiacu.
Na cai llueve. Llueve, llueve, llueve, llueve, llueve y asina hasta l’infinitu y más p’allá.
En casa, el sofá atópase atestau.
Chúquense debaxo les mantes una muyer cola so fía, que cuando quieren son les mies; yo mesmu, y un par de gates, de les que sobra decir, que cuando quieren somos d’elles.
Todes pigacen. Yo resístome.
Ente tantu, toi fixándome, en que una de les gates ronca, mientres a la otra tan dando-y espasmos, d’esos de cuando ties suaños axitaos.
¿Con qué suañarán los gatos?



jueves, 17 de enero de 2013

Capiellin colorau

Érase una vegada una neña bien guapa. So madre, había-y fecho una capa colorada y la neña llevábala tan de seguío, que tol mundu entamó a llamala Capiellin Colorau.



lunes, 14 de enero de 2013

Carne trémula (making off)

Pasu ente pasu y cola camiseta pegada a los excesos de mazapán, afrontamos les primeres cuestes d'esti añu qu'estrenamos.
El día ta buxu y friu, típicu día ivernal pa la primer salida del añu del grupu monte. Nun soi l'únicu que resopla, más que menos, pa toes ye la vuelta'l caleyar depués de feches tan señalaes.
Pero volvamos a la camiseta, que ye de marca, térmica y ún de los regalos del día de reis. De mariella que ye, manca; primera de les regles na moda montañeril; y axustada, según reza la teoría de la cebolla. Lo que tien la camiseta, siempre dientro los cánones especificaos, ye que oprime, física y anímicamente. Oprime hasta'l puntu de querer renegar cristianamente de la cena cabera; non bien pola fartura non, más bien pol reniegu en sí, que tamien presta. ¿Y embaxo d’ella? Nótolo. Grasa y sebu, que ximielgándose rítmicamente, intenta rellenar tolos requexos posibles d'esa prenda que ye de marca, térmica, mariella y ún de los regalos del día de reís.
¡ Redios¡ nun hai escusa posible. El nuevu propósitu pa esti añu qu'estrenamos, intentar convencer a quien me quiera regalar una camiseta, que la compre una talla mayor.




jueves, 3 de enero de 2013

Ya tan equí

Queridos reis magos:
Busco les escuses necesaries pa qu’escaezais toles mal-interpretaciones de los mios actos pasaos y vos quedéis sólo con que tenemos un añu per delantre pa enmendar posibles maldaes; feches, eso sí, ensín intención.
Dame lo mesmo colo que vengais, nun soi esixente, l’único que vos pido, ye que traigais los camellos, últimamente faéseme insufrible la realidá na que vivimos y polo tanto, siento la terrible necesidá d’astraeme. Yo asegúrovos, pola mio parte, que debaxo mio casa nun existe nengún cementeriu indiu del que vos tengais que preocupar, aunque la verdá, nun conozo tanto a les mios vecines, sólo decivos que a vegaes, sí son un poco poltergueis. Na más, un besu y vení con procuru, que ta la cosa mala.