miércoles, 27 de febrero de 2013

Paleontoloxía chigrera (o intenta tú esplica-y a un neñu, o neña, que nunca enxamás convivieron seres humanes con dinosaurios)

L’home de croooooooooo, l’home de maaaaaaaaaaaa, l’home de Ñoooooooooon…
L’home de Cromañón nun tá fechu de cartón, nun tá fechu de llatón.
Na vieya prehistoria, doscientos sieglos p’atrás, foi cuando existió, enllenu gloria, un home semiorangután; usaba les pates traseres y un taparrabos de visón, cuando entamó la so gloriosa carrera, el famosu home de Cromañón.
L’home de croooooooooo, l’home de maaaaaaaaaaaa, l’home de Ñoooooooooon…
Tenía visos de poeta y a vegaes chispes de gran lluz, y decía-y al so amorín "yes más guapa qu’un mamut”; si nun descansaba na cueva, na paré pintaba un mural, que nin Goya, nin Picasso, nin el gran Dalí lu pintaban igual".
L’home de croooooooooo, l’home de maaaaaaaaaaaa, l’home de Ñoooooooooon…
L’home de Cromañón.


P.D.: Gracies fonderes a Ana Moro pola idega d’esti post.



viernes, 15 de febrero de 2013

Antroxu

Una sensación d'ingravidá, asentose-y nel costazu. ¿Un mareu?
Creía tar preparau, en forma; llevaba tiempu entrenando, negociando les probabilidaes necesaries p'algamar l'éxitu, faciendo incansablemente exercicios memotécnicos, xunto con un plan específicu de ximnasia que lu tenia tol día d'atrás p'alantre. Ah, y había comprao el traxe completu nos chinos de la esquina.
Pero nesi intre, mientres salía pol portal, diose cuenta, pola cantidá de xente y el barullu qu'atopó, que s'había dormido.
¡Putu reló molecular! ¡Mierda de cama gravitacional!
¿Y agora qué? A eses hores, de xuru que Plutón, el so llugar de destín, ya nun taría onde debía tar, de xuru qu'habría inclusu dexao de ser un planeta y ya naide s'acordaría d'el; habría desaparecio hasta de les conversaciones.
Cagüen... ¿Por qué tuve qu'escoyer Plutón?
Bono, a grandes males, grandes remedios. A Plutón ya nun diva, pero si apuraba, podía llegar a tiempu a Galiana, que neses feches llera un sitiu amañoso pa folgar con cantidá de xente marciano.


P.D. El descensu Galiana ye una folixa típica del antroxu Asturianu.
Al parecer, que nun lo digo yo, la cai Galiana, na villa d'Aviles, conviértese'l martes d'antroxu, nel más grande escaparate de xente mazcarizao de too Asturies. Mira tu.

lunes, 11 de febrero de 2013

Ultramarinos Vallina

Tienen que haber pasao seis años, seis, pa qu'el nome d'esti blogue cobre realmente sentíu.
"La sacabera errante" asentose, nel común de la blogosfera, como complementu visual del programa de Radio Sele "En Forma Sacabera"; aunque hai quien diz, siempre maliciosamente, que naz pa vanagloria retratística del que suscribe.
Anda que...
Angüaño, les sacaberes ya nun tan en forma, ya nun salen tanto, son más responsables; que ye lo mesmo que decir que marcharon a por tabaco, qu'escaparon, que fuxeron como agüarones n'estau de pánicu al primer síntoma del afondamientu del barcu ertzianu.
Cobardes...
Eso sí, dexáronnos puestu negociu y non de peluquería.
"Ultramarinos Vallina" abre les sos puertes al públicu en xeneral tolos llunes ente les 18:30 y les 20 hores; les 24 hores toes seguies al travies del twitter, el Llibrucara, y como non, na www.radiosele.net; aunque si lo que queréis ye un contautu direutu y personalizau, podéis probar a usar enformasacabera@gmail.con
Asina ye como reza'l cartel qu'atopamos na puerta'l local cada vegada que les errantes pasamos p'elli a mirar si hai tarxeta postal de les nueses hermanes.
¡Mira que ta lloñe l'estancu, redios!
Ye pues, qu'apartir d'agora camudaremos l'argumentación por: "Ultramarinos Vallina", el complementu sonoru perfeutu pa una meyor comprensión de "La Sacabera Errante". Siempre, claro ta, que nun se tea n'estaos carenciales; y por supuestu, cuando los mélicos endocrinos y estomatolóxicos asina lo recomienden. Queda claro, a reí muertu, alegría republicana.