jueves, 21 de marzo de 2013

Faciendo l'indiu

Miro pa un llau y na.
Miro pa l'otru y sigo ensín ver na.
Golifo l'aire y piesyo los güeyos intentando abrir les oreyes..., pero na de na.
Les buelgues son clares y parez que de va pocu tiempu, anque en realidá nun tengo ni la menor idega; que mas quisiera yo que ser un indiu Seminola en plan rastreador.
¿Indios? ¿Por qué a los pueblos nativos del norte d'América los llamaben indios, si nun lleren de la India? Sirva como exemplu el saber que nel sureste de los Estaos Xunios, lo que güei ye Arizona, Nuevo México y parte de Texas, agrupávense unes 57 tribus: Hopis, Holis, Zuñis, Acoma, Laguna, Navajos, Apaches, Maricopa, Quechan, Pimas, Pápagos, Mojaves, Tarahumara y yo que se cuantos mas. Bono, si se, hasta 57 pueblos dixebraos. ¿Solo por qué creien haber atopao la India ya-yos quedo’l san benitu? Amos home.
Dalguien glaya: ¡mira-y, mira-y, ellí tan! ¿Cuantos hai?
Mierda, yo creyéndome'l meyor de los rastreadores Maricopa y ente tantu pásenme per delantre y nun m'entero.
Flipo coles buelgues, hai cientos, miles d'elles que van d'un sitiu pa otru. Grandes y pequenes, recientes y vieyes. Pero nos, nun somos Hopis, non. Nin Navajos, Nin Acoma; solo somos un piñu xente que vamos camín d'el Retiñón nun día de los que fae afición al monte; metiendo ruiu y resoplando, quexándonos de les cuestes y ente rises; dalgo que los Quechan nun fadrien, elles diríen en silenciu y con paciencia animista, siguiendo los pasos de los sos guíes, buscando la presa o el camin mas afayaizu.
 Llevar guies y buscar el camín mas afayaizu ye l'único que mos asemeya a los pueblos nativos del norte d'América, solo que los nuesos son los que más resoplen por dir fozando cola ñeve reblandecío.
Non, nun somos nengún pueblu masacrau pol home blancu, lo mesmo que yo nun soi nengún rastreador Seri, tengo que asimilalo, más bien, un resoplador mas con ínfules d’esplorador Navajo.
 Que-y vamos facer.





miércoles, 6 de marzo de 2013

De sidres y sidros dicen

Dicen, que na parroquia Valdesoto, hai un castiellu; anque me parez que nun llega a tantu, vamos dexalo en palaciu.
Dicen tamién, que peles caleyes de Lliceñes, que ta na parroquia Valdesoto, cuerre la sidra; anque bien mirao, más que correr la sidra, son los Sidros los que llamen a comedia.
Dicen, que del sieglu XVIII ye’l palaciu del Marqués de Canillejas, enantes palaciu de los Carreño-Solís.
Y tamién dicen, al parecer, qu’hai qu’enfusase na nueche los tiempos, p’atopar l’orixe los Sidros (dellos autores como Constantino Cabal y Fausto Vigíl, califíquenlos como mázcares d’iviernu, arrexuntándolos baxo esta denominación xunto a otres, como los Zamarrones de L.lena, los Bardancos de Casu, los Guirrios de Llaviana, Samartín del Rei Aurelio y Llangreo, los Sidros de Bimenes, Os Reises d’Ibias y el Guirria de Ponga. Esti tipu de mazcaraes, defínenles comu manifestaciones que sirven pa festexar el pasu del iviernu a la primavera, cellebrándose ente la Navidá y l’antroxu)
Dicen, como non, que los meyores Sidros, fueron siempre los de la parroquia Valdesoto y los de pueblos como Lliceñes, La Rasa, La Horria y Areñes.
Dicen qu'en Lliceñes, na parroquia Valdesoto, nel conceyu Siero, los Sidros achiquen sidra a lo lloco.
¿Habralo más guapo?
Y dicen tamién, qu'en Lliceñes, les neñes gasten madreñes pa baillar y que les que nun tienen, toquen la gaita.
Pues va ser que si, que lo hai más guapo.



Da-y les gracies a Nacho Gonzalez pola so cultura toponímica. A Paula, Moki, Delfo, Lluci y tola Asociación pola recuperación de los Sidros y les Comedies "EL CENCERRU", pol gran ratu que mos ficieron pasar. P’aumentar información so los sidros y les comedies, pue accedese a la web http://www.sidrosycomedies.es