miércoles, 8 de mayo de 2013

Hi-yo, Silver, away!

La subida nun da tregua. Ye verdá que toi encantau colo guapo que m’arrodia, pero tá costándome.
Tamos subiendo al Carriá, nel conceyu Ponga; voi entreteniu mientres busco’l camín qu'atraviesa una pequena mata boscosa; fixándome, como escusa pa parar, en cada detalle de los troncos retorcios ¡Redios, como me ta costando! Voi sólu, al mio ritmu, ensin priesa, col enfotu puestu en que un pie siga al otru; todes tenemos el nuesu Himalaya particular y güei el Carriá, ye'l miu.
Agora l'aire sopla un poco más fuerte qu'enantes, motivu de mas pa una nueva parada, piesllar los güeyos y llevantar la cabeza. Que prestu l’aire frio.
Toi más sólu que nunca, o polo menos eso creo yo. P'atrás queda la viesca mesto; delantre, la xente que m'acompañaba y... la cuesta.
Ye entos cuando lu veo; más sólu que yo, mas azotau pol aire que yo, más independiente que yo, más en porrica y fráxil que yo; o eso quiero creer.
Que coses; veolu ehí, como intentando pasar desapercibiu y a mí, con esti cansanciu que ya me parez infinitu, solo se me pasa pela cabeza'l Llaneru Solitariu. Que fatada.


2 comentarios:

  1. Dasme envidia . De mayor prestaríame saber escribir como tú.
    Como siempre: ¡¡¡Perguapo!!!
    Un saludu.

    ResponderEliminar
  2. Nun seas fatu Arturo que lo faes tan bien o meyor que yo.

    ResponderEliminar