martes, 23 de julio de 2013

Perder el norte

Había tao xugando tola tarde nel parque de onde casa. Primero con Nayara, Manuel, Marta, Ibrahim y Barbara, pa más tarde tar con Abdul, Jose, Bassirou, Itza, Mónica, Rosita, Carmela y Yan.
Maria, Faiz, Sofia, Nel, Tasio, Aiko, Gael, Asur y Aldemba habien llegao un poco más tarde y cuando’l sol taba ya chucándose, aparecieron Tom, Hammadoun, Olson, Xuan, Tsukiko y Peter que venien del campamentu urbanu.
Muncho habia disfrutao la guah.a, pero agora nun facia más que llorar, caien-y unes llarimones que pa qué y nun facia más que repetir: Que lu perdí mama, llevábalu conmigo y perdilu
¿Pero el que neña? –insistía-y so ma- ¿Qué perdisti que tantu t’esmolez?
El norte ma, que perdi el norte y nun se onde…



P.D. Oxalá les adultes fuesemos siempre tiernes infantes.

lunes, 15 de julio de 2013

Tamien llueve en Ciudá Real

El coriu esnala a estes hores pel cielu de Toledo; salió ceo de casa, nun quería que-y garrase'l calorón de Castiella, el mesmu qu'obliga a cubrir les cais d'esti pueblacu espaderu, con esa murallona y esa xudería atestá de xente.
Toledo..., na; nun impresiona al coriu; nun ye él de ciudaes, como muncho, podríemos decir que-y molen los pueblos, si ye que-y molase la xuntanza coles persones; pueblos como pol que pasa agora mesmo; Almagro, villa de corralas, onde'l sol aprieta pero nun afuega, achicharra.
Lo que nun sabe'l coriu, que nun entiende de fronteres, ye que ta esnalando penriba la provincia Ciudá Real, esa gran desconocida, tierra d'olivos y vides, de xente aceitunao por obra y gracia del sol nesti secarral d'agua escondida y que n'años como nel que tamos, opulente de llíquidu elementu, déxase ver con nidia contundencia.
Ye esta una primavera agradecida d'agua y el coriu sábelo y aprovéchase, por eso ta equì.
Termina esta etapa, ye feliz; va de pasu pal Sur, emigra, pero enantes, quería pasar unos díes d'asuetu estival nesti paraisu acuosu y mosquiteru. Daimiel. Probablemente nunca lu vuelva ver como tá agora mesmo, tan rebosante d'agua y vida.



martes, 2 de julio de 2013