martes, 7 de enero de 2014

De cuando conocimos a Madeleine

A Madeleine mola-y más la tradición xaponesa que la cántabra. Onde va parar; muncho meyor ser bicha de bona suerte, que parte d’una familia de siete demoños venides del avernu na nueche San Xuan, que pa santu ye bonu, pero pa complica-y la esistencia a Madeleine ye meyor. 
Presta-y a Madeleine acordase de qu’en Xapón, por comer un tabanín de ná, punsieron-y’l nome a unes illes; a saber, Akitsu Shima. 
Bono, en realidá, lo que fizo una pariente llonxana de Madeleine, según siempre les cróniques del sieglu V, foi pegase col tábanu qu’acababa de picar al vixésimu primer emperador del Xapón, Yuryako Tenno, metanes taba pigazando nun prau de la provincia del Nara, que ye como si tuviere ehí pa Cualloto, pero en xapones. 
A Madeleine mola-y sentise arguyosa, porque esti rapaz, l’emperador, punso-y de nome al prau onde taba chucau: Akitsu-no, que vien a ser lo mesmo que decir: el prau de la libélula, o la llanura la libélula, o dalgo asina. ¡Pero cuidadín qu’ehí ye ná!, que según les mesmes fontes que citen too esto, pué ser que d’esta hestoria, venga´l nome vieyu de les illes del sol naciente: Akitsu Shima, o lo que ye lo mesmo, les Illes Libélula. 
Que arguyosa ta Madeleine… 
Y si esto nun fora poco, a les parientes de Madeleine (cortañarices, burrinos del diañu y caballinos del tamien avernosu ser), nos confines de onde naz el sol, llámenles insectos victoriosos, y tan consideraes sinónimos de bona suerte ¡de que si non van permitir lo d’insectos…! 
A Madeleine molen-y les hestories xaponeses y nun-y presten ná les hestories cántabres. Al parecer, na nueche de San Xuan, según susodicha tradición, los sacagüeyos salen de so casa (l’avernu) pa estrozar la pación buscando tréboles de cuatro fueyes nacies esa mesma nueche y asina, les persones nun les puedan atopar y nun-yos son concedios los deseos que a esta planta tan asociaos. Anda que…, según les mesmes cantabres, esos deseos son cuatro: vivir milenta años, nun sufrir nengún dolor, nun pasar fame y soportar cualquier contrariedá como un paisanu. Cántabros teníen que ser… Siguen cuntando les llinguateres, que los sacagüeyos son siete y qu’encarnen a homes que perdieron l’alma polos sos pecaos y bla, bla, bla…. 
A Madeleine nun-y presta falar d’esti tema. Madelene “porfía” d’esta tradición. 
Madeleine ta segura que tol mundu sabe, que la vida de libélules y sacagüeyos poco tienen que ver col ardiente infiernu, tolo contrariu, ya que so vida pasenla xunto al agua; ellí cacen, follen, ponen los güevos y les sos larves viven en formatu subacuáticu hasta que son grandes.
A Madeleine molen-y les hestories xaponeses y nun-y presten ná les cántabres, pero ¿sabéis que ye lo que más gustu-y da a Madeleine…? 
A Madeleine lo que más gustu-y da, son les tradiciones hindús; porque nel mas famosu llibru que tienen, el “Kamasutra”, hai una postura col so nome “la libélula”




Posdata: la información cultural so les libelules, atopela nun blogue mui prestosu que se noma “alma biológica”.
Los nomes n’asturianu de tan prestoses biches, apurriómela Laura, que al parecer atopola nel ''entamu al dicionariu natural asturianu'' de Xuan Porta.
Y les semeyes… Bono, lo de les semeyes… ¿intentasteis dalguna vegada retratar libélules o sacagüeyos ensín escondevos ni trípode? Pues eso, les semeyes son d’esti que suscribe.

1 comentario:

  1. Nota aclaratoria: los distintos Nomes n'asturianu de los sacagueyos y libelules, vienen de parte de una neña llamada Montse; Laura, non menos importante , fizo na mas que de intermediaria corta-pegadora. Gracies a les dos.

    ResponderEliminar